Categories
Belarusisch

Святлана Ціханоўская на сустрэчы з дыяспарай у Берліне

Народная лідэрка папрасіла беларусаў замежжа не спыняцца і актыўна заклікаць мясцовыя ўлады далей падтрымоўваць Беларусь і ўплываць на рэжым. Святлана таксама нагадала, што мы можам палепшыць шэрыя турэмныя будні палітычных зняволеных, даслаўшы ім хаця б адзін ліст або паштоўку ў тыдзень.

Святлана пагутарыла ня толькі з журналістамі, але таксама з многімі людзьмі, якія падыходзілі да яе з пытаннямі, прапановамі або словамі падзякі. Ад імя Евангелічнай царквы Германіі, пастар па экуменічных сувязях Кай Фэлер (Любэк-Лауэнбург) выказаў падзяку Святлане Ціханоўскай за яе нястомныя намаганні і ўручыў падарунак ад Гамбургскай дыяспары.

Арганізатары акцыі падрыхтавалі яркі калядны выступ, вершы ад маленькіх удзельнікаў акцыі і вялікую інсталяцыю – ялінку з манітораў, на якіх трансляваліся самыя яскравыя моманты пратэстнага руху беларусаў.

Акрамя тых, хто змог прысутнічаць на Gendarmenmarkt асабіста, да нас далучылася вялікая колькасць людзей праз жывы стрым. З намі быў нават Хабараўск, дзе ў гэты час была глыбокая ноч.

Дзякуй усім і кожнаму за ваш удзел і падтрымку! Святлана Ціханоўская, дзякуй за ваш візіт!

Categories
Belarusisch

Індустрыйны прафзвяз металургаў праяўляе салідарнасць з мірным пратэстам у Беларусі

Салідарнасць без меж! Індустрыйны прафзвяз металургаў Германіі праяўляе салідарнасць з мірным пратэстам працоўных у Беларусі і заклікае Камітэт па ўсходнееўрапейскіх эканамічных адносінах не заставацца ўбаку і адркыта выказаць пазіцыю ў дачыненьні да падзей у Беларусі. Тэкст ліста прыводзім ніжэй.

Камітэт па ўсходнеэўрапейскіх эканамічных адносінах
спадар Олівер Гермес
– Старшыня ўправы –
Breite Straße 29

10178 Berlin

Апошнія падзеі ў Беларусі

Шаноўны спадар Гермес,

Мы з вялікай заклапочанасьцю назіраем за развіцьцём падзей у Беларусі. Мірныя пратэсты супраць відавочна сфальсіфікаваных прэзідэнцкіх выбараў доўжацца ад жніўня 2020 года. Гэтыя пратэсты падтрымваюцца шырокай грамадскай супольнасьцю. Шматлікія працоўныя бяруць гэтаксама ўдзел у акцыях пратэсту й страйках на сваіх заводах.

Дзеяньні супраць пратэстоўцаў становяцца ўсе больш акрутнымі. На сёняшні дзень арыштавана больш за 26 000 чалавек. Пратэстоўцаў зьбіваюць, зьневажаюць, арыштоўваюць і катуюць. Пратэстоўцы-працаўнікі запалохваюцца працадаўцамі, іх заробкі і грашовыя дапамогі скарачаюцца, шмат хто звальняецца. Пры гэтым яшчэ йіх выклікаюць на допыт дзяржаўныя ворганы, пераследуюць ў судовым парадку, арыштоўваюць ды даюць прысуд.

Шмат якія нямецкія кампаніі вядуць актыўную дзейнасць у Беларусі, ці падтрымваюць дзелавыя адносіны з беларускімі кампаніямі. Такім чынам у сітуацыі, што склалася, яны ўскосна падтрымваюць рэжым А. Лукашэнкі.

03.11.2020 Вы запатрабавалі: “Працэс мірнага дыялогу больш няможна адкладаць”. Вы канстатавалі масавыя запалохваньні, відавочна неабгрунтаваныя арышты, а таксама тое, што на вуліцах прысутнічаюць вайскоўцы. Вы заклікалі заснаваць “круглы стол” у якасьці першага кроку на шляху да ўрэгуляваньня канфлікту, які працягваецца ўжо некалькі месяцаў.

На жаль, у гэты час мы назіраем масавае ўзмацненьне рэпрэсій. Шумавыя гранаты выкарыстоўваюцца для здушэньня мірных пратэстаў, усё часьцей паступаюць паведамленьні пра катаваньні й зьдзекаваньні з арыштаваных дэманстрантаў, а таксама пра першыя сьмерці ў выніку жорсткага ўжываньня сілы.

Мы не можам трываць падобны стан рэчаў у цэнтры Эўропы. Словы і заклікі ўжо не дастатковыя. Нямецкі бізнес не павінен падтрымваць жорсткі рэжым Лукашэнкі датуль, пакуль ён не будзе гатоў размаўляць з грамадскай супольнасьцю й апазіцыяй у сваёй краіне ды адмовіцца ад ужываньня гвалту.

Мы чакаем ад Вас выразнай публічнай пазіцыі ў дачыненьні да падзей у Беларусі, наступальнай рыторыкі за спыненьне гвалту, выразнага патрабаваньня да дзелавых партнэраў у Беларусі шанаваць правы чалавека й правы працоўных ды не браць удзел у рэпрэсіях. Павага праў працаўнікоў і праў чалавека павінна быць неадменнай умовай добрых дзелавых зносінаў, якія знаходзяцца пад пагрозай з прычыны цяперашніх рэпрэсій.

Вы, як прадстаўнік нямецкай эканомікі, павінны выразна данесьці гэта да беларускага ўрада, а таксама да беларускіх дзелавых партнэраў. Ужываючы жорсткія захады супраць шырокіх пластоў грамадства, Лукашэнка ўводзіць сваю краіну ў палітычную, сацыяльную і эканамічную катастрофу.

З найлепшымі зычэньнямі

Ёрг Хофман
1-ы старшыня

Categories
Belarusisch

10.12.2020 – Міжнародны дзень правоў чалавека

Заклік да дбаньняў за вызваленьне палітвязьняў у Беларусі

10 сьнежня – Міжнародны дзень правоў чалавека. У гэты дзень у 1948 годзе Арганізацыя З’яднаных Нацый прыняла Ўсеагульную дэклярацыю правоў чалавека.

Мы, Libereco – партнэрства па правах чалавека і беларуская згуртаваньне RAZAM, хацелі б скарыстаць гэтую дату дзеля таго, каб прыцягнуць увагу да лёсу палітычных зьняволеных у Беларусі.

Пасьля сфальсіфікаваных прэзідэнцкіх выбараў напачатку жніўня ў Беларусі пачасьціліся выпадкі гвалту. Прадстаўнікі міліцыі паводзяць сябе вельмі жорстка ў адносінах да мірных дэманстрантаў. Зь лета было арыштавана больш за 30 000 чалавек. Болей за 145 зь іх былі зьняволены ў турме на некалькі месяцаў у якасьці доўгатэрміновых палітычных зьняволеных. Сярод іх юрысты, журналісты, студэнты, прадстаўнікі апазіцыі, праваабаронцы, анархісты і шмат якія паспалітыя людзі, якія проста рэалізавалі сваё права чалавека на вольнасьць слова і сходаў.

Таму мы заклікаем арганізаваць у шмат якіх гарадох Германіі ў чацьвер, 10 сьнежня 2020 года, дбаньні і акцыі салідарнасьці для палітычных зьняволеных у Беларусі ды іх неадкладнае вызваленьне. Libereco і RAZAM зь задавальненьнем прапануюць інфармацыйныя матэрыялы й шаблоны плякатаў.

Libereco RAZAM